අයි.ඩී.. මෙහාටත් එයිද? ආවොත් මොකෑ කොරන්නෙ?

මාතෘකාව මේ ජාතියේ අයි.ඩී ගැන නොවේ..

           ඔය පින්තූරෙ දාල තියෙන අටමගල අමුතුවෙන් තෝරල දෙන්ඩ ඕනෙ නෑනෙ මචන්ල.. හැඳුණුම්පත කියන පොෂ් කඩු වචනෙන් හැඳින්වෙන, වෙන්ඩ පොෂ් එවුන් අයිඩෙන්ටිය, අයිඩිං කාඩ් එක කියල යන්තම් ජාමෙ බේර ගන්න, ඒ වුණාට නියම හෙළ බාසාවෙන් කතා කොරද්දි අයි.ඩී කියල කියන ලැමිනේට් කොරපු කොළ කෑල්ල දැකල නැති පුතයෙක් ඉන්නව නම් ඌ ලංකාවෙ නාසිගුරාන් කාපු එකෙක් වෙන්ඩ බෑනෙ බොලවු.. ඕක දෙන්නෙ පුද්ගලයන් ලියාපදිංචි කිරීමෙ දෙපාර්තමේන්තුව කියන රාජ්‍ය හොර ගුහාවෙන්නෙ ළමයි.. කොල්ලෙක් නම් බෙල්ලෙ තියෙන ඇඩම්ගෙ ඇපල් ගෙඩිය යන්තම් කැඩීගෙන එනකොට ගිරාම සේවක උන්නාන්සෙ ළඟට ගොහින් කොළ කෑල්ලක් පුරොවන්ඩ ඕනෙ.. උන්නාන්සෙ අර හොර ගුහාවට ගිහින් ඒකෙ ඉන්න ඈයින්ට නොවඳිනා වැඳුම වැඳල (පගාව එහෙම නොදී හරිය?) ඉක්මන් කොරෝගත්තෙ නැත්තං අවුරුද්දක් විතර බලං ඉඳල තමයො ඕන් ගන්ඩ වෙන්නෙ.. ඔයාකාර ලියාපදිංචි නැති එකෙක් ඉන්නව නම් ආණ්ඩුව ගානෙ නොමිලේ මරල දෙනව මයෙ හිතේ.. හැබැයි ඉතින් ඔයාකාර කොළ කෑලි අච්චු ගහන්නෙ ආණ්ඩුවෙන් විතරක් නෙමෙයි අයිබොං.. සසිරිබර මෙසිරිලක තියෙන හැටහුටහමාරක් කොම්පැනි, ඇන්ජීඕ, 20 විජ්ජාල වලිනුත් දෙනව ඔය අයි.ඩී කොල කෑලි ඒවයෙ වහල් සේවෙට කැප කරපු උන්ගෙ බෙල්ලෙ එල්ලන් ඉන්ඩ.. හැබැයි ආණ්ඩුවෙ ඒවයෙ වගේ නෙමෙයි ගොඩක් ප්‍රයිවේට් අයිඩී තහඩු වල අකුරු කොටල තියෙන්නෙ සිංහලෙන්.. (ආණ්ඩුවෙ එකේ ඉතින් කඩ්ඩෙන්නෙ, ඕක කවුද නොදන්නෙ? ඒක නොවැ පිටරට වල උන් තඹේකට මායිම් කොරන්නෙ නැත්තෙ ආණ්ඩුවෙ අයි.ඩී කාර්ඩ් එක.. පිටරටවල වැඩ හිංගලෙන්නෙ අයිබොං, අපිට මේ බම්බුවෙ කඩු පික්ෂුවක් තිබ්බට ).. ඉතින් චෙක් පොයින්ට් පොජ්ජකදි අර කොම්පැනි අයිඩී එකක් එහෙම මුලිච්චි කරොත් පොලිස් වීරයාණන්වහන්සෙලගෙන් අම්බානකට නොමිලේ අහ ගතහැකි..

          හැබැයි ළමයි මම කතා කොරන්ඩ යන්නෙ ඔය අයි.ඩී ගැන නම් නෙමෙයි.. මං කියන්ඩ යන අයි.ඩී එක කොළ කෑල්ලකට වඩා පොඩි සීන් එකක් තියෙනව.. කොටින්ම ඒකෙන් කතා කොරන්නෙ ලෝකෙ ඉන්න මිනිස්සු, සත්තු ගහකොළ හැදිච්චි හැටි ගැන.. හැබැයි ඉතින් ඔය අයි.ඩී ජාති දෙකටම පොදු එක දෙයක් නම් තියෙනව.. දෙකම ලොවෙත් ගොන් පාර්ට්.. එක අයි.ඩී ජාතියක් හදල තියෙන්නෙ මුනිෂි ගිහිං ලොක්කන්ට බෝම්බ ගශයි කියල බයේ මුනිෂි අඳුරගන්ඩ.. නැත්තං කොම්පැනි වල වාල්කං කොරන උන්ට ඒ වෙලාවට පොඩි ප්‍රොෆෙෂනල් ආතල් එකක් දෙන්ඩ.. අනික් ජාතිය හදල තියෙන්නෙ එකසිය ගාණට දැන් බොරු වීගෙන යන ආගමික විස්වාසෙක විලිසංගෙ බේරගන්ඩ..

          හරි හරි.. වැඩේ අලයි ගෝවයි ටපලෝගන්නැතුව කෙළිම්ම බහිමුකො ටොපික් එකට.. අයි.ඩී කියල දික් කොරල තියෙන්නෙ "ඉන්ටෙලිජන්ට් ඩිසයින්" කියන කෙටි හෙළ වචනෙ.. කඩ්ඩෙන් කිව්වොත් "බුද්ධිමත් සැලැස්ම".. ඕන්නම් ඉස්සරහට බු.සැ කියමුකො.. ඒ කියන්නෙ මොකක් හරි ලබ්බක් ගත්තොත් ඒක මොළේ තියන ඩයල් එකක් අම්බානක් ප්ලෑන් කරල හදපු එකක් කියන කතාවනෙ මල්ලි.. දැන් හිතල බලන්ඩ ඔරලෝසුවක්.. ඕකෙ ඇතුළ ෆට්ට සංකීර්ණයි කියල අමුතුවෙන් කියන්ඩ ඕනෙ නෑනෙ.. හැටහුටහමාරක් දැති රෝද.. එකකින් තප්පර කට්ට කරකෝනව.. අනිකෙන් විනාඩි කට්ට.. තව එකකින් පැය කට්ට.. ඒ අතරෙ තියෙන දැති රෝද වලින් අරව එකිනෙකට සම්බන්ද කොරනව.. බට්ටව පද්දන්ඩත් ඕනෙ.. දුන්නක් තියෙනව වයින් කොරන්ඩ ඒකෙ "වයින්" දවස් ගානක් තිස්සෙ ඩිංග ඩිංග රිලීස් වෙවී දැති රෝද කරකොවන්ඩ ඕනෙ.. පැය කාලෙන් කාලට ටං ටං ගාන්ඩ ඕනෙ.. තප්පර කට්ට හරියටම හැටක් ගියාම තමයි විනාඩි කට්ට එකක් යන්නෙ.. විනාඩි කට්ට හැටක් ගියහම පැය කට්ට යන්ඩ ඕනෙ.. ඔය එකක් හරි හැට වෙනුවට පනස් නමයෙන් ගියොත් ඔර්ලෝසුවෙ වෙලාව වැරදියි.. ඔර්ලෝසුවෙන් ලොවෙත් වැඩක් නෑ.. ආහ්.. ඒ විතරක් නම් මදෑ.. රස්නෙ කාලෙට ඕක ඇතුළෙ තියෙන යකඩ කෑලි දාහෙන් එකක් විතර දික් වුණොත් මුළු වැඩේම හබක්.. ඒ හැම එකම හරියට කම්පනා කොරල අවුරුදු ගනං හරියට වැඩ කොරන ඔරලෝසුවක් හදන එකා සිරා ඩයල් එකක් වෙන්ඩ එපායැ.. (ඔය මම කිව්වෙ එකදාස් හත්සිය ගනවල හදපු හද්ද පරණ ඇන්ටික් භාණ්ඩයක් ගැන.. අද කාලෙ තියෙන ඩිජිටල් ඔර්ලෝසුවක් හරි ඊටත් කොම්පියුටරයක් හරි ගත්තොත් නම් ඒක හදපු හැටි හදපු එකාටම ඇර වෙන මෙලෝ පුතයෙකුට වර්ක් අවුට් කරගන්ඩ බෑ.. එහෙම නේද?)..

          හරි.. ඔය ඔරලෝසුව හදපු "සිරා ඩයල් එක" අපි හිතමු ස්විට්සර්ලන්තෙ ඉන්නෙ කියල.. පොරගෙ නම සිරිපාල කියමුකො.. එතකොට බට්ට ඔරලෝසුව හැදුවෙ ස්විට්සර්ලන්තෙ සිරිපාල.. එතකොට සිරිපාලව හැදුවෙ අහවල් පුතයෙක්ද?

          ඔන්න ඔය සීන් එක තමයි අයිබොං අයි.ඩී (බු.සැ ) වලිං ඇඩ්‍රස් කොරන්නෙ.. සිරිපාලයගෙ ඇඟ කපල බැලුවොත් ඒක නං ලොවෙත් සංකීර්ණ භාණ්ඩයක් තමයි.. ඌ හදපු ඔර්ලෝසුව තියා දැං කාලෙ තියෙන කොම්පීටරයක්වත් අහලකින්වත් තියන්ඩ බෑ.. ඉතින් සිරිපාලයගෙ විතරක් නෙමෙයි සිරිපාලයගෙ බල්ලව කපල බැලුවත් ඔය සීන් එකම තමයි ළමයි.. ඕනෙම සතෙක්, ගහක් කොළක් කපල කොටල ඒකෙ ව්‍යුහෙ බැලුවොත් පුදුමෙ වැඩිකොමට හාර්ට් ඇටෑක් හැදෙන තරම් සංකීර්ණයි.. ඉතිං මෙච්චර සංකීර්ණ සත්තු හැදුනෙ කොහොමද?

          දැන් ඉතින් ඕගොල්ලො අහන්ඩ පුළුවන් "අපි කොහොමද ඇන්නෑවෙ සත්තු හැදිච්චි හැටි දන්නෙ?" කියල.. ඒකත් හරි බලන් යනකොට.. අපි කොහොමද ටක්කෙටම දන්නෙ? විද්‍යාව කියල එක බයිලෙකින් කියනව පරිණාමෙද මොකක්ද කෙහෙම්මලක් ගැන.. ආගං වල මැවීමක් ගැන දොඩෝනව.. තවත් එකක ආභස්සර බ්‍රහ්මලෝකෙන් තංගුස් ලණුවක් දිගේ සත්තු බැහැපු කතාවක් කියනව.. අයි.ඩී වල මුල් අදහස ආවෙ ඕක පැහැදිළි කොරන්ඩ තමයි.. මුලින්ම ඕක ගෙනාවෙ විලියම් පේලි කියල එන්ගලත්තෙ පාස්ටර් උන්නාන්සෙ කෙනෙක් එකදාස් අටසීයෙ විතර.. පොර ("පොර" කිව්වට තරහ ගන්ඩ කාරි නෑ ඕන්) කිව්ව මෙහෙම කතාවක්..

විලියම් පේලි

          දැන් හිතන්ඩ කාන්තාරෙක ඇවිදින මිනිහෙක් ගැන.. මිනිහට පේනව වැලි කඳු, ගල් එහෙම.. මිනිහ ගලක් අරං කපල බැලුවයි කියමුකො.. ලොකු ගල වගේම පොඩි ගලත් ඉතිං ගල්ම තමයි.. ගල හරිම සරලයි.. හැදිල තියෙන්නෙත් මෙලෝ පිළිවෙලකට හැඩේකට නෙමෙයි.. ඉතිං එහෙම සිම්පල් දෙයක් ඉබේ හැදුන වෙන්ඩ පුළුවන්.. ඒත් හිතන්ඩ පොරට අර කලින් කියපු සිරිපාලයගෙ ඔරලෝසුව විසික්ක කොරල දාල තිබිල හම්බෙනව කියල.. ඒක කපල බැලුවොත් නම් ලොවෙත් සරල නෑ.. විශේෂ හැඩයක් තියෙනව.. අකුරු / ඉලක්කං ලියල තියෙනව.. ඇතුළෙ අම්බානක් දැති රෝද, දුනු, යකඩ කෑලි පිළිවෙලකට තියෙනව.. හරිම සංකීර්ණයි.. හිතන්ඩ අච්චර සරල ගල නම් ඉබේම හැදුණ වෙන්ඩ පුළුවන්.. ඒත් ඔරලෝසුව? ඒක සංකීර්න වගේම ඒකට අරමුණකුත් තියෙනව (වෙලාව බලන එක ).. එහෙම භාණ්ඩයක් නම් ලොවෙත් නිකම්ම හැදුන වෙන්ඩ බෑ.. හදපු මිනිහෙක් ඉන්ඩ ඕනෙ.. (අපි ඉතින් දන්නවනෙ ඒ ඔරලෝසුව නම් හැදුවෙ සිරිපාලය කියල ).. ඒත් ඊටත් වඩා සංකීර්ණ සිරිපාලය? අනික් මිනිස්සු? සත්තු? උන්ව හදපු කෙනෙක් ඉන්නවද? හැදුවෙ කවුද? 

          හදපු කෙනෙක් නැතුව ඉබේ ඇති වුණා වෙන්ඩ නම් බෑ කියල පේලි උන්නැහැ මුලිම්ම කිව්ව.. ඊට පස්සෙ ඉතින් පොර කිව්වෙ දෙවියන්වහන්සෙ තමයි මිනිස්සු සත්තු හදල තියෙන්නෙ කියල.. අපි අමතක කරන්ඩ හොඳ නෑ පොරට තිබ්බෙ උත්තර දෙකයි කියල.. එකක් තමයි සත්තුන්ව ගල්, වැලි වගේ සරල දේ වලින් නිකම්ම හැදෙනව කියන එක.. අනික තමයි කවුරු හරි හෙන සිරාම සිරා ඩයල් එකක් ඉඳගෙන සත්තු, මිනිස්සු ඩිසයින් කරනව කියල.. ඩිසයින් කරන එකා තමයි දෙවියන්වහන්සෙ .. ඔය දෙකෙන් වැඩියෙන්ම ඉඩක් තියෙන්නෙ දෙවෙනි එක කියල පේලි උන්නැහෙ තීරණේ කොරනව.. ඕක තමඉ ළමයි අයිඩී වල මූලික කතාව..  

          ඔන්න ඉතිං ඔය කයිකතන්දරේ යුරෝපෙ ඉන්නෙ වංගොහන්සෙල ටික පිළි ගත්ත.. හදපු එකෙක් නැතුව එච්චර සංකීර්ණ සත්තු හැදෙන්ඩ පුළුවන් කියල උන්ට ලොවෙත් මීටර් වුණේ නෑ.. උන්ට හිතුනෙම, එක්කො ඒව එකපාරට නිකම්ම හැදෙන්ඩ ඕනෙ, එහෙම නැත්තම් කවුරු හරි එකෙක් හදන්ඩ ඕනෙ කියල.. එකපාට්ට නිකම්ම හැදෙන එක ලොවෙත් වෙන්ඩ බැරි දෙයක්නෙ ලමයි.. ඒ හින්ද කවුරු හරි හැදුවම තමයි.. හදපු එකා දෙවියො..

          හැබැයි ළමයි උන් වංගොහන්සෙල කියන්ඩමත් බෑ.. මොකෑ උන් ඕක කිය කිය හදපු මිනිහට යාඥා කොර කොර හිටියෙ නෑ.. එකදාස් අටසීය ගණන් වල තමයි උන්ගෙ කාර්මික විප්ලවේ උණේ.. යන්තර සූත්තර හදල, පැක්ටේරි ඇරල, එක රාමෙට වැඩ කොලා යුරෝපෙ දියුණු කොරන්ඩ (අනික් රටවල් වලින් ලාබෙට ගත්තු දේවල් වලින් තමයි කොලේ, ඒක අපි පැත්තකිං තියමුකො ).. පැක්ටේරි වලට බඩු යවන්ඩ වරායවල් හැදුව.. තඩි පත නැවු බඩුත් එක්ක රට ඇතුළට ගෙනියන්ඩ මහවැලි ගඟ සයිස් ඇළවල් කපන්ඩ ට්‍රයි කොරා.. ඒකටයි පැක්ටේරි දුවවන්ඩ ගින්දරට දාන්ඩ ඇටකටු හොයන්ඩයි අඩි සිය ගණන් පොළව හාරන්ඩ උණා.. අම්මට උඩු.. මොනවද පොළව හාරද්දි හම්බුණේ? 

භූවිද්‍යාත්මක ෆොසිල ස්ථරායනය

          මොනාද ඉතිං ඇටෂකිලි තමයි.. හැබැයි අයියා, පොඩි කොෂ්ෂකුත් තිබ්බ.. මුනිෂිගෙ ඇතකටු හම්බුණේ උඩිම්ම තිබ්බෙ පෂ් තට්ටු වල විතරයි.. යටට යන්ඩ යන්ඩ හම්බෙච්චි සත්තු ඩිංග ඩිංග වෙනස් වෙලා ගිහින් යටම හිටියෙ මහ අමුතුම සත්තු.. අද කාලෙ ඒ ජාතියෙ සත්තු ලොවෙත් නෑ ලොවි ගහෙත් නෑ.. හැබැයි එක ලෙවල් එකක හම්බෙච්චි සත්තු, ඊට කිට්ටු ලෙවල් වල හම්බෙච්චි උන්ට සෑහෙන්ඩ සමානයි, ගොඩක් ඈතින් ඉන්න උන්ට වඩා (තේරුණා නේද කියපු දේ?).. ඉතිං කාලයක් යනකන් ඕක පහදගන්ඩ බැරුව කෂ්ටිය අඤ්ඤකොරොස් වෙලා හිටිය..

          ඔය කාලෙම තමයි අයිබොං විද්‍යාඥ උන්නැහෙල පොළවෙ වයස හොයන්ඩ ට්‍රයි එකක් දෙන්ඩ ගත්තෙ.. ඊට කලිං නම් අෂර් කියල පාස්ටර් උන්නැහෙ කෙනෙක් (බම්බුවෙ මුන් ඇර වෙන එවුන් ඉස්සර කතා කොරලම නැද්ද හැබෑට?) කියල තිබ්බෙ ලෝකෙ වයස අවුරුදු හයදාස් ගානක් කියල.. ලෝකෙ මවපු දිනෙයි වෙලාවයිත් පොර ටක්කෙටම කිව්ව (ක්‍රි.පු 4009 ඔක්තෝබර් හය උදේ නමයට මගෙ හිතේ).. බයිබලේ කතාවත් ඔය වයස එක්ක ටක්කෙටම හරි යනව මගෙ හිතේ.. අනුන්ගෙ කුලියක් මලියක් කොරාන සතෙක් මරාන ඉස්සර හිටපු නූගත් මුනිෂිට ඕවෑ වගක් තිබ්බෙ නෑ.. ඒත් විද්‍යාඥ ගොල්ලොන්ව අන්දන්ඩ එච්චර ලේසි වුණේ නෑ ළමයි.. 1850 වෙනකොට ලෝකෙ අඩුම ගානෙ අවුරුදු කෝටි දහයක්වත් වෙන්ඩ ඇති කියල ඒ අය හොයාගෙන තිබ්බ.. ඉතිං දැන් හිතන්ඩ බලන්ඩ, අවුරුදු කෝටි ගාණක් පරන ලෝකෙක එක එක කාලෙ ඉඳල තියෙන්නෙ එක එක සත්තු.. කොහොමෙයි ඕක පැහැදිළි කොරන්නෙ? 

          එක්කො එක එක කාල වල හිටපු සත්තු එකෙක් නෑර මැරිල වෙනස්ම උන් සෙට් එකක් අහසිං පාත් වෙන්ඩ ඕනෙ.. නැත්තම් අර දෙයිය කියන පිස්සට නිකං ඉන්ඩ බැරුවට ඌ එක එක කාලෙට එක එක සත්තු මව මව, ඉන්න එවුන් මර මර ඉන්ඩ ඕනෙ.. එහෙමත් නැත්තං??? 

          ඇයි ළමයි, ඉන්න එවුන් ජුන්ඩ ජුන්ඩ වෙනස් වෙවී අළුත් උන් හැදෙන්ඩ බැරි ද? අමතක කරන්ඩ එපා, ලෝකෙ අවුරුදු කෝටි ගානක් පරණයි.. ඕනෙ මළදානයක් නිවීහැනහිල්ලෙ සිද්ද වෙන්ඩ ඕනෙ තරං කල් තියෙනව.. ඒ හින්ද ලොවෙත් හෙමිං ඒ වගේ වෙනසක් වෙනව වෙන්ඩ පුළුවං.. අපිට ඒක පේන්නෑ මොකෑ අපිට හිතාගන්ඩ බැරි තරං හිමිං තමයි වැඩේ වෙන්නෙ.. ඒත් එක එක කාල වල ඇටසැකිලි දැක්කාම හිතාගන්ඩ පුළුවං වෙලා තියෙන විදිහ.. 

චාර්ල්ස් ඩාර්වින්

          අහල තියෙනවෙයි "පරිණාමවාදය" කියල එකක්? ඒක මහලොකු අමුතු බයිලයක් නෙමෙයි මං දැං උඩ කියපු සංසිද්දියම තමයි.. කලිං ඉන්න සත්තු/ ගහකොළ ඩිංග ඩිංග වෙනස් වෙවී අළුත් සත්තු / ගහකොළ හැදෙන්නෙ කොහොමෙයි කියන එක.. හැබැයි ළමයි ඕක වෙනව කියල බුදු ෂුවර් උනාට මොන ඇන්නෑවක් හින්දද ඕක වෙන්නෙ කියල නම් මෙලෝ යකෙකුට හිතාගන්ඩ බැරුවයි හිටියෙ.. චාර්ලිස් ඩාවිං උන්නැහෙ තමයි ඒකට ලොවෙත් නැති තියරියක් ගෙනාවෙ.. පොර බේසිකලි කිව්වෙ එක එක සත්තු අතරෙ වෙනස්කං තියෙනවය, වෙනස්කං වලට හේතුව නම් පොර දන්නෙ නැත ය, ඒත් වෙනස්කං තියෙද්දි පරිසරේ වෙනස් උණොත් ඉන්න සත්තු ටික අතරෙං පරිසරේට හොඳටම ෆිට් වෙන එකා අනික් උන්ට වඩා ඉතුරු වෙනවය, ඒ හින්ද කාලයක් යද්දි අනික් උන්ට වඩා අර ෆිට් බුවාල ටික ටික වැඩි වෙලා මුලු ගහනයම කලින් තිබ්බෙ එකට වඩා වෙනස් එකක් වෙනවය කියන එක.. ඔයාකාර කොතෙකුත් වෙනස් වෙවී වෙනස් වෙවී අවුරුදු කෝටි ගානක් යද්දි කලින් හිටියට වඩා ලොවෙත් වෙනස් උන් හැදෙන එක ආයි අහන්ඩ දෙයක් යැ? 

           ඒ උණාට බුවාගෙ තියරිය හරිද මං අහන්නෙ? ඩාවිං ගොයිය දන්න දේට වඩා නොදන්න දේ වැඩියි කියලනෙ ලොවෙත් පේන්නෙ? දැන් හිතහං ඌ දන්නෙ නෑ සත්තු වෙනස් වෙන්නෙ කොහොමද කියල.. අනික් එක බුවා හරියටම ලෝකෙ වයස දැනං හිටියෙත් නෑ.. 

          හරි.. අනික් විද්‍යාඥ ගොල්ලො ඉතිං ලංකාවෙ උං නලින් ද සිල්වව උඩ දාං දඟලනව වගේ "ඩාවිං අයියා අපෙ අයියා" කිය කිය ඉන්නැතුව නැහීගෙන වැඩ කොරා, ඌ කියපු මගුල් ඇත්ත ද බලන්ඩ.. ග්‍රෙගර් මෙන්ඩල් කියල හාදයෙක් ගස් වව වව ඉඳල හොයාගත්ත පරම්පරාවෙන් පරම්පරාවට වෙනස්කං යන හැටි.. ජොහැන්ස් කියල ඩයල් එකක් හොයා ගත්ත ඔය සීන් එක වෙන්නෙ සයිල වල තියෙන ජාන කියල ජාතියක් හින්ද කියල.. ඔය අස්සෙ විකිරණ පරික්ෂණ වලිං ටක්කෙටම ලෝකෙ වයස කියන හැටි කට්ටිය ඉගෙන ගත්ත.. ඩාවිං කාරය කිව්වෙ උගෙ තියරිය ඇත්ත වෙන්ඩ නං අඩුම ගානෙ කෝටි දහයක් වෙන්ඩ ඕනෙ කියලනෙ.. අම්මට උඩු.. ලෝකෙ වයස අවුරුදු කෝටි හාරසිය පනහක්.. හොදි ඕන්නෑ නේද? 

          ඔය අස්සෙ තව ගොඩක් දේවල් උනා.. කාබන්-14 කියල රෙද්දකිං අර ගොඩගත්තු ඇටසැකිලි වල වයස කියන්ඩ පුළුවං උනා.. මුල්ම කාලෙ හිටියෙ මොන වගේ උන් ද කියලත් ඩිංග ඩිංග මීටර් වෙන්ඩ ගත්ත.. මුල්ම කාලෙ අපි වගේ සංකීර්ණ හාල්පාරුවො ඉඳල නෑ.. ඉඳල තියෙන්නෙ බැක්ටීරියා, ඇමීබාවො වගේ උන්.. ඊට පස්සෙ ලොකු ඇල්ගි, දිලීර වාගෙ ඒව.. ඊටත් පස්සෙ පණුවො වගේ සත්තු.. ඔහොම ඔහොම ගිහිං ටික ටික තමා සංකීර්ණ වෙලා තියෙන්නෙ.. ඒක එහෙමයි කියන එක නිකං හිතළුවක් එහෙම නෙමෙයි ළමයි, සාක්ෂි තියෙනව මදි නොකියන්ඩ.. 

ඩාර්වින් නිමවූ පරිණාමීය වෘක්ෂයක්

          කොටිංම ඩාවින් හරි කියන එක ආයෙ දෙකක් නෑ.. 

         ඊට පස්සෙ වොට්සන් ක්‍රික් වෙළඳ දෙබෑයො ජාන අඩංගු වෙන ඩී.එන්.ඒ අණුවෙ ව්‍යුහය හොයාගත්ත.. රිචර්ඩ් ඩෝකින්ස් උන්නැහෙ වගේ අය පරිණාමයෙ ජාන තියරිය ඉදිරිපත් කරා.. ඩාවින්ගෙ තියරිය කොච්චර රිලයබල් ද කියනවනං ළමයි, සත්තු විතරක් නෙමෙයි මැෂිනුත් පරිණාමය වෙනව කියල පැක්ටේරිකාරයො එක එක රෙද්දවල් කරනව උන්ගෙ බිස්නස් සරු වෙන්ඩ.. මාක්ස්වාදියටයි, ධනවාදියටයි, ජාතිවාදියටයි කොටින්ම හැම පියදාසයට සිරිසේනයටම "ඩාවිනිසම්" පට්ට නොගහ බැරි වුණා..

          දැන් අපි ආයෙ ජුන්ඩක් අතට ගම්මුද මුලින්ම කියපු සිරිපාලයගෙ ඔර්ලෝසුව? දැන් හිතන්ඩ.. ඔර්ලෝසුව සිරිපාලය හැදුව වගේ සිරිපාලයව හැදුවෙ දෙයියොම වෙන්ඩ ඕනෙද? ඩාවිං උන්නැහෙ කියන විදිහට අවුරුදු ගානක් තිස්සෙ ඩිංග ඩිංග හැදුන වෙන්ඩ බැරිද? (එහෙම වෙච්චි බවට සාක්සි හිටං තියෙනවනෙ අයිබොං).. අනික් අතට දෙයියො කියල බුවෙක් ඉන්න බවට හරි, ඌ මොනම ලබ්බක් හරි මවපු බවට කොයි සාක්සි? (පොත් වල තියෙන කයිකතන්දර වෙනම කතාවක්.. එහෙනං ඉතිං 550 ජාතකේ තියෙනව කියල සත්තු කතා කොරා කියන්ඩ බැරියැ?).. ඉතිං ඔය හින්ද විද්යාවෙ පිළිගන්නෙ පරිණාමවාදෙ තමයි.. 

          හැබැයි ළමයි හිතන්ඩ එපා ඕක ඔහොමයි කියල සුද්දොයි ඇමෙරිකන්කාරයොයි ලොවෙත් පිළිඅරගෙන කාල බීල සැපසේ උන්න කියල.. ක්‍රිස්තියානි දෙයියො දැන් ඉන්න විදියටම ලෝකෙ මැවුව කියන එක ගොඩක් සුද්දොන්ගෙ ඔළු වලින් අයින් කොරන්ඩම බෑ (හරියට අපේ උන්නාන්සෙලගෙ ඔළු වලිං පුනරුප්පත්තිය අයිං කොරනව වගේ).. ඒ හින්දම පරිණාමෙ කොච්චර ඇත්ත උණත් ඒක උගන්නන එකට ඉස්සර ඉඳන්ම ගොඩක් අයට මළ පැනල තිබ්බෙ.. 

          1925 දි ටෙනසි වල හිටපු ජෝන් ඉස්කෝප්ස් කියල ඉස්කෝලෙ මහත්තයෙක් පරිණාමෙ ඉස්කෝල වල උගන්නන්ඩ හැදුව කියල හිරේ අරින්ඩ හැදුව.. ඇමෙරිකාවෙ හැම ප්‍රාන්තෙකම පරිණාමෙ උගන්නන එක තහනං කොරන නීති ගෙනාව.. ටෙනසි වල මයෙ හිතේ ඒ නීති 1964 වෙනක්ම්ම තිබ්බ.. ඔය අස්සෙ 1960 ගණං වල අළුතෙං හදපු ඉස්කෝලෙ පොත් වලට පරිණාමය එන එක නවත්තන්ඩ බැරි උනා.. මොකද කලිං වගේ ආණ්ඩුවෙ ඔල්මොරොන්දම් ඩයල් නෙමෙයි පොත් හදන්ඩ දැම්මෙ ඉස්කෝලෙ මහත්තුරු නෝනල මයි.. ඒ හින්ද පරිණාමවාදෙ උගන්නන එක දැන් නම් කොච්චර දහිරිය දැම්මත් නවත්තන්ඩ බැරි බව මැවුම්වාදී සෙට් එකට පේන්ඩ පටාන් ගත්ත.. ඉතිං මැවුම්වාදියො ටික මොකෑ කොළේ? 

          ඒ පාර උන් කියන්ඩ ගනිපි, පරිණාමවාදෙ විතරක් උගන්නන එක සාදාරන නෑ, උගන්නනව නම් දෙකටම සමාන ටයිම් දීල උගන්නපියවු කියල.. කිය කිය හිටියෙ නෑ, එහෙම කොරන්ඩ නීතිත් දැම්ම අයිබොං.. විද්‍යාව පාඩමට අමු බොරු උගන්නන්ඩ වෙලා ටීචර්ලට ආයි ෆුල් නස්පුක්.. ඒත් ඒ බයිලාවල් වැඩිකල් ගියෙ නෑ.. 1975 දි සිරා වැඩක් වුණා.. ඔන්න ඕක තමයි මං කියන්නෙ මොනව උණත් ඇමෙරිකාව සිරා රටක්ය කියල.. ඒ රටේ ව්‍යවස්ථා කරදහියෙ තියෙනව මහ අමුතුම බයිලයක්.. ආණ්ඩුව ලොවෙත් කිසිම ආගමකට උදවු කොරන්ඩ හරි කෙළ කොරන්ඩ හරි බෑ කියල.. ඉතිං මැවුම්වාදෙ කියන්නෙ ක්‍රිස්තියානි, මුස්ලිම්, යුදෙවු කයිකතන්දරයක්නෙ ළමයි.. ඒ හින්ද ආණ්ඩුවෙ ඉස්කෝල වලයි 20විජ්ජාල වලයි මැවුම්වාදෙ උගන්නන එක තහනම් කොරන්ඩයි කියල දෑහිතකාමී ටීචර්ල සෙට් එකක් දාපි නඩුවක්.. හරියට හරි.. ඉස්කෝල වල මැවුම්වාදෙ තහනම් උණා එක රැයින්.. (ලංකාවෙ නම් කොරයි!!)

මයිකල් බීහි

          ඔන්න ඔය දවසෙ තමයි ළමයි එකම එක මනුස්සයෙක් ටෙකීලා, බ්‍රැන්ඩි බිබී (මම වාගෙ ) රෑ නින්දක් නැතුව කම්පනා කොරන්ඩ ගත්තෙ.. පොරගෙ නම මයිකල් බීහි.. විද්යාඥයෙක් තමයි.. හැබැයි හිත යටින් තද ආගංකාරය.. පොරට ෆුල් අප්සෙට් නඩු තීන්දුව ගැන.. ඉතින් කන්නෙත් නැතුව බොන්නෙත් නැතුව නාන්නෙත් නැතුව තනියම හිත හිතා ඉඳල බැරිම තැන පොර යාළු මැවුම්වාදියො එක්ක සෙට් වෙලා දාහතේ කම්පනා කොරා මොන මගුලක් ද කොරන්නෙ මේකට කියල.. අම්මට උඩු.. "විලක් තියේ නම් ගෙම්බෙක් ද ඇත" කියන්නැහේ ආවෙ නැතැයි පොඩි අයිඩියා පොජ්ජක්.. 

          මොකෑ දන්නව ද සෙට් එක කරේ? කලිං ඉස්කෝලෙ මැවුම්වාදෙ උගන්නපු පොත් තිබ්බනෙ.. ගත්ත ඒ ටික.. කැපුව "දෙයියො" කියන එකයි "මැවීම" කියන එකයි.. රිප්ලේස් කොරා "බුද්ධිමත් සැකැස්ම", "සැකසුම්කරු" කියන වචන වලිං.. හරි නෙ බොලේ.. "මැවීම" කිව්වොත් නෙ ආගමක් වෙන්නෙ.. කොහොමෙයි ටිකිරි මොළේ? ඔන්න ඔහොම තමයි අයි.ඩී ආයෙත් හිස එසෙව්වෙ..

          හැබැයි ළමයි විද්‍යා පන්ති වල උගන්නන්ඩ නම් ඔහොම වචන වෙනස් කොරාටම බෑ.. අඩුම ගානෙ විද්‍යාව වගේ පේන්ඩවත් තියෙන්ඩ ඕනෙ කියල කෂ්ටියට තේරුණා.. ඉතිං අයි.ඩී විද්‍යාත්මකයි කියන්ඩ කෂ්ටිය ලොවෙත් නැති තියරි ගෙනාව..

          එයිං එකක් තමයි අර පේලි උන්නැහෙ මුලින්ම කියපු බයිල කතාව.. හැබැයි පේලි ඔර්ලෝසුව සතාට උපමා කොළාට දැන් වැඩක් නෑ.. මොකද සරල සත්තු ඩිංග ඩිංග සංකීර්ණ වෙච්චි හැටි පරිණාමවාදෙං යස අගේට පැහැදිළි කොරලයි තියෙන්නෙ.. ඒ හින්ද මුන් දැම්ම අළුත්ම ටැක්ටික් එකක්.. බීහිගෙ සබ්ජෙක්ට් එක තමයි ළමයි සයිල ජීව විද්‍යාව.. ඉතින් පොර කළේ සයිලයෙ තියෙන ජුන්ඩි කොටස් අරගෙන "ඒව නම් ලොවෙත් සංකීර්ණයි, එක කෑල්ලක් හරි අයින් කරොත් මුළු සිස්ටම් එකම වැඩ කරන්නෙ නෑ, ඒ හින්ද ඒක පරිණාමය වෙලා ඩිංග ඩිංග සංකීර්ණ වුණා වෙන්ඩ බෑ, ඒ හින්ද පරිණාමෙ බොරු" කියන කතන්දරේට ආපු එක.. කුරුල්ලගෙ පිහාට්ට, මිනිහගෙ ඇහැ එහෙමත් ගත්ත උදාහරණ හැටියට.. පිහාටු බාගෙකින් හරි, ඇහැක බාගෙකින් හරි ඇති වැඩේ මොකක්ද කියල හෙන පොර වගේ ඇහුව..

ඔය අතරෙ ළමයි හෙන ෆේමස් නඩුවක් ගියෙ..

          ඩෙල්වෙයාර් ප්‍රාන්තෙ ඩෝවර් කියන ඒරියල් එකේ තිබ්බෙ ඉස්කෝල පරික්ෂක මහත්තුරු (මෙහෙ වගේ නෙමෙයි අයිබොං උන් චන්දෙන් පත්වෙන්නෙ ) නීතියක් දැම්ම බීහි ගොයියගෙ පච පොත ඉස්කෝල වල උගන්නන්ඩ ඕනෙ කියල පරිණාමවාදෙත් එක්කම.. ටීචර්ල බෑ කිව්ව හින්ද පරික්ෂක මහත්තුරුම ඇවිල්ල විනාඩියක ලෙක්චර් එකක් දෙන්ඩ තියාගත්ත අයි.ඩී ගැන.. ඒ පාරනම් ටීචර්ලට විතරක් නෙමෙයි දෙමවුපියන්ටත් ෆුල් මළ.. ඇයි යකෝ විද්‍යාව කියල තමුන්ගෙ ළමයට බොරු උගන්නන්ඩ තියා ගත්තහම මොන පුතයටද මළ පනින්නෙ නැත්තෙ? ඉතිං කෂ්ටිය එකතු වෙලා (අරුං කරපු බොරුව කාරිය හොයාගෙන ) දැම්ම නඩුවක්..

බැක්ටීරියා ෆ්ලැජෙල්ලම

          දෙපැත්තෙම ලොකු පොරවල් ෆේස් ටු ෆේස් ෆයිට් කරපු, දවස් ගණං විද්‍යාව ගැන වාද කරපු ඒ නඩුව ඇමෙරිකන් ඉතිහාසෙ අමතක වෙන්නෙ නැති සීන් එකක්.. බීහි ගොයියට චාන්ස් එක දුන්න පරිණාමය වෙන්ඩ බැරි තරම් සංකීර්ණයි කියල පොර කියන දේවල් පෙන්නන්ඩ කියල.. පොර ඉතිං පෙන්නුව, කෑලි පනහකින් හැදුනයි කියන බැක්ටීරියා වල තියෙන කෙඳිත්තක් (ෆ්ලැජෙල්ලම් කියල කියන්නෙ, ඒකෙන් බැක්ටීරියාවට එහෙ මෙහෙ යන්ඩ සප් එක දෙනව ).. අනික් පැත්තෙ හිටියෙ කෙනත් මිලර් උන්නැහෙ (එයා ගැන මම වෙනම කතා කොරන්නම්කො ) පෙන්නුව, අහවල් එකේ කෑලි හතළිහක් අයින් කොළාට පශ්ශෙත් ඒක ප්‍රයෝජනවත් වෙන හැටි.. ඊට පස්සෙ බීහි ගොයිය පෙන්නුව ලේ කැටි ගැහෙන සිස්ටම් එක, ප්‍රතිශක්ති පද්ධතිය එහෙම (මේව නම් පුතෝ පරිණාමය වෙන්ඩ විදිහක් නෑ කියල ).. ඒව පරිණාමය වෙච්චි හැටි ගැන කරල තියෙන පරීක්ෂණ දුසිම් ගනන් මිලර් උන්නැහෙ ගෙනැත් තිබුණ.. ඒව එක එක වෙන වෙනම කියෙවුවත් බීහි නෙමෙයි පිළිගත්තෙ.. අන්තිමේ ජජාටම මල පැනල "තමුසෙ පිස්සෙක්නෙ ඕයි" කියල වහාම තීන්දු කොළා අයි.ඩී කියන්නෙ පල් බොරුවක්, ආගමික ඉගැන්වීමක්, ඒ හින්ද ඉස්කෝල වල ඒක උගන්නන්ඩ තහනම් කියල (සීන් එක කියන්නෙ, ඒ ජජා ක්‍රිස්තියානි ජජෙක්).. එදා නම් ගොඩක් අයගෙ අයි.ඩී කුඩු..  

          ඔන්න ඔහොමයි ළමයි අයි.ඩී කියන මළදානෙ ඇති වුණෙත්, ඒකට හොදි ඕන්නැති වෙන්ඩ කෙළ වුනෙත්.. (ඔය අයි.ඩී රෙද්ද හින්ද තමයි ළමයි මගෙ ආගම බිහි උනෙත්.. මතකනෙ කලින් මම කියපු පැස්ටෆේරියන් ආගම.. ඇමෙරිකාව පුරාම විද්‍යාවට හිතැති -අපි වගේ- ඩයල් පාරට බැස්සෙ අයි.ඩී හරි මොන .ඩී හරි කියල ක්‍රිස්තියානි මැවීම උගන්නනව නම් පියාඹන ස්ෆැගටි රාක්ෂයා ලෝකය මැවුවය කියන එකටත් සමාන කාලයක් ඉස්කෝලෙ දෙන්ඩයි කියල.. ලංකාවෙ ඔහෙල ආගමික රෙද්දවල් විද්‍යාවට ඉගැන්නුවොත් අපි මෙහෙත් පාරට බහිනව හරිය?)

          හැබැයි ඉතිං හිතන්ඩ එපා ඩෝවර් නඩුවෙන් පැරදිලා නස්තාර් වෙලා හිටියට අයි.ඩී මැරිල කියල.. ඩෝවර් වලින් පස්සෙත් අයි.ඩී උගන්නන්ඩ "අවසර දෙන්ඩ" කිය කිය එක එක බයිල නටන්ඩ හැදුව සමහර ප්‍රාන්ත ආණ්ඩු.. ඇමෙරිකාවෙ විතරක් කොටු නොවී ක්‍රිස්තියානි, මුස්ලිම්, යුදෙවු රටවල් හැම එකටම වසංගතේ පැතිරිලා.. එක්කො පරිණාමෙ උගන්නන්ඩ එපා, නැත්තම් අයි.ඩී ත් උගන්නන්ඩ කියල කෑගහන ඩයල් දැන් ලෝකෙ පුරාම.. එහෙම එක ෆේමස් බුවෙක් තමයි තුර්කියෙ ඉන්නෙ හරුන් යහියා.. පොර අමුතු මගුලක් කියන්නෙ නෑ.. බීහි කියපු බයිලම පොඩ්ඩක් කුණු කූඩෙං ඇදල අරං වමාරනව මිසක්කං.. එකම දේ පොර හෙන ගණන්, කලර්ඩ් පොත් ගහල නොමිලේ බෙදනව.. කොටින්ම පොරගෙ මගුල් නිසා තුර්කියෙ පරිණාමෙ උගන්නපු එක සම්පූර්ණෙන් නැවතිලා..

          අන්තිමට වශයෙන්, මේ කොහෙවත් යන මළදානවල් ගැන ලියන්නෙ මොකටෙයි කියල පේක්ෂක ඔබ සැම අහන්ඩ පුළුවන් නෙ.. ඇත්තටම ඇමෙරිකාවෙ හරි සමක ගිනියාවෙ හරි මොන තූත්තුකුඩියක හරි වැරැද්දක් වෙනව නම් ඒකට ෆුල් ගේම ඉල්ලන්ඩ පොඩි උණක් නම් මට තියෙනව තමයි.. ඒත් කවද හරි ඔය මරාලෙ මෙහාට කඩං පාත් වෙන්ඩ බැරි නැති හින්දයි වැඩියක්ම ලියන්ඩ හිතුවෙ.. විද්‍යාව "අපේ නෙමෙයි" වාගෙ ගොන් පාර්ට් දැනටමත් තියෙනවනෙ ළමයි.. ඉතිං බැරි වෙලා හරි අයි.ඩී ම නැතත් "අග්ගඥ්ඥවාදය", හරි "නාථ දේව විද්‍යාව" හරි පොඩි උන්ගෙ විද්‍යා බත් පතට රිංගවන්ඩ හැදුවොත් එහෙම "අපිත් ඉන්නව" කියන එක මතක තියා ගැනීම ලොවෙත් ප්‍රයෝජනවත් වෙයි මම හිතන්නෙ..